香港人o係京都既生存率係比o係香港仲高既. 1. 一樣有壽司烏冬拉麵刺身oden仲有馬肉(Basashi Oishiiiiiii), 唔會餓瓜 2. 交通班次準確,遲到唔會俾人鬧瓜 3. 上山吸5分鐘空氣加你10年命, 企o係銅記SOGO門口吸5分鐘超純度一氧化碳/二氧化硫監生剪短你10年命 4. 嫁唔出既女仕可以試試夜晚出街博下有無色狼,機會率高過中6合彩少少咁啦.

去到嵯峨嵐山 (SagaArashiyama) 車站, 第一眼見到幾百人排緊隊買小火車 (Torokko) 既車票. 好彩排得快,唔係龍尾果d人就橙. "今日滿座,明天請早". 我同朋友都係買到企位咋. 其實可以2拜前訂飛,但係因為夾時間關係,唔買住. d紅橙黃綠青藍紫既景色有幾靚就唔使多趕.

之後買小船飛從桂川河既角度再欣賞嵐山景物, 只可以講: 美不勝收. 不過奉獻一句: d唔識聽日本船員講解既朋友與及果d怕悶既死o靚仔死o靚妹就無謂坐喇. 第1, 買完飛原來唔可以行得遠,要聽廣播叫自己個名就即刻要報到,焗住要買個自動販賣機200円既大杯麵帶上船. 第2,全程由搞笑船員一個划艇一個講解周邊景致,d日本妹就好受落喇,唔識日語既香港仔女我驚會妒忌兼悶到跳河自盡.

去過金閣寺,清水寺,係好靚,但本人唔係諗住睇靚野,而係要feel下以前既寺廟,所以去一去銀閣寺. 鍾意佢不施脂粉, 原汁原味, 遊客只可遠觀不可褺玩既保育精神同某國際都會既話拆就拆手法相差9倍. 附近亦有d別舍俾僧侶禪修,清簡非常. 當中感受到既比起其他整過容既寺廟更多,真係 Less is More~

睇完,沿住哲學小路行去南禪寺,簡直係人生一大快事. 一來無咁多人,唔使前推後擁趕鴨仔,仲可以欣賞到相信係全亞洲唯一一條參照古羅馬水道而建成既水道. 朋友仲以為我唔識野以為係一條橋,典豬俾我大番轉頭.

行完. 去左一間爆出名,有'自家製'豆腐既160年老店'順正'. 食開pizza hut果d超濃味pizza意粉或老麥既朋友去到一定死無葬身之地,皆因佢既食材全部清淡為主, I'm loving it~ 臨走前仲買左松茸昆布and木之芽煮,遲幾日開黎煮.

仲有好多見聞,不過唔諗住講喇.